image
13 Januari 2018 | Suara Banyumas

Cablaka

Ketemu Maning, Adu Arep

  • Anggitane Kang Sigit Oediarto

Sapa sing dadi Calon Bupati kambi Wakil Bupati Banyumas nang coblosan taun 2018 wis genah. Ana mung rong pasang thok sing resmi ndaptar maring KPU Banyumas lagi dina Rebo (10/1) winginane.

Rong pasangan calon kuwe mau yakuwe pasangan Achmad Husein - Sadewo Tri Lastiono karo pasangan Mardjoko - Ifan Haryanto. Pasangan Achmad Husein - Sadewo Tri Lastiono dadi calon sing diusung dening PDIP, Partai Nasdem karo Partai Demokrat. Angger pasangan Mardjoko - Ifan Haryanto, diusung dening Partai Golkar, PKB, Partai Gerindra, PKS, PAN kambi PPP.

Pasangan calon sing wektu ndaptar diiring-iring genjringan karo kenthongan kuwe mau, siki lagi dideleng dhisit syaratsyarate nang KPU kambi kon melu tes kesehatan. KPU nembe agep netepna pasangan calon sing melu pilkada serentak 2018 nang Kabupaten Banyumas, mengko tanggal 12 Februari. Sing genah ora bakal ana pasangan calon maning merga daptaran wis tutup, dadi mung ana rong pasang thok.

Agi leganu, pilkada taun 2013 pasangan calon ana enem pasang. Rong pasang sekang jalur perseorangan yakuwe pasangane Toto Dirgantoro-Saefuddin (Toto-Sae) kambi dan pasangane Anteng Tjahyono Widyadi-Dwi Basuki (Oyong-Uki). Banjutan patang pasang deusung dening gabungan parte politik. Yakuwe Mardjoko-Gempol Suwandono sing deusung Partai Golkar, Partai Hanura, dan Partai Gerindra, pasangan Achmad Husein-Budhi Setiawan (Husein ber- Budhi) sing deusung PDIP kambi PPP.

Terus pasangan Warman Suharno-Winarni (Wani) sing deusung PAN kambi PKS lan pasangan Muksonudin-Hendri Anggoro Budi (Muri) sing deusung Partai Demokrat, PKB kambi Partai Karya Peduli Bangsa. Bosa pilkada siki, merga mung ana rong pasang thok, dadi bakal adu arep. Wong sing adu arep kuwe wong sing wis kondang nang tlatah Banyumas, Pak Husein karo Pak Mardjoko. Wong loro kuwe, wektu pilkada 2008 maju dadi pasangan Bupati/Wabup.

Banjutan nang pilkada 2013, maju dhewek-dhewek dadi calon Bupati, ning sing kepilih dadi Bupati Pak Husein. Nang 2018, Pak Husein kambi Pak Mardjoko ketemu maning, malah adu arep siji-lawan siji kanggo nggayuh krusi R1. Merga wong loro kuwe mau wis tau dadi ramane Wong Banyumas kabeh, mesthine wis bisa nimbang-nimbang kirakira sapa sing mengko-mengkone agep decoblos.

Mergane wong loro kuwe mau wis tau mimpin lan kaya apa kasile wis bisa dirasakna lan diweruhi dening masyarakat. Kari ndeleng mengko agep kaya ngapa program sing bakal ditawakna dening pasangane Husein - Dewo karo Mardjoko - Ifan. Inyong rika kabeh precaya lamona kabeh bakal nawakna program sing apik-apik kanggo wong Banyumas. Pak Husein pengin njagong dadi Bupati sing kepindo.

Pak Mardjoko sing wis ping telu njago, uga pengin ngalahna Pak Husein. Merga adu arep, dadi pilkada 2018 Kabupaten Banyumas bakal rame. Mulane inyong rika padha sing padha nduwe bithing aja ngasi gampang dikompor-kompori.

Semena uga sing padha dadi botoh kudu bisa njaga, pilkada Banyumas 2018 kudu lancar, aman, jujur lan adil. Apa sing diomongna dening pasangan Husein - Dewo kambi Mardjoko - Ifan sing lagi tes kesehatan nang Solo liwat video sing wis semebar dina wingi, ”Iwak mas dijangan lodeh, pilkada Banyumas aman dech”, kudu bener-bener bisa diwujudna. (*)

Berita Lainnya